Майстры аддзела рамёстваў Слонімскага цэнтра культуры у рамках рэалізацыі раённага праекта “Культурную спадчыну продкаў зберагаем разам!” праводзяць для дзяцей і моладзі мерапрыемствы, якія дазваляюць малодшаму пакаленню знаёміцца з традыцыйнай беларускай культурай.
Так, для маленькіх жыхароў аграгарадка Новадзявяткавічы быў арганізаваны традыцыйны калейдаскоп “Часоў злучаная ніць”.
Падчас мерапрыемства, якое адбылося у філіале “Новадзявяткавіцкі цэнтр культуры”, дзеці ўбачылі выстаўку творчых вырабаў майстроў аддзела раместваў, прысвечаную 85-годдзю стварэння Слонімскага раёна, даведаліся пра багатую культурную спадчыну і таленавітых майстроў, былі праведзены майстар-класы па аплікацыі саломкай, мастацкім роспісе, карункапляценні і саломапляценні.
Прыемна адзначыць, што дзеці былі ўражаны і шчыра зацікаўлены творчай дзейнасцю і вырабамі традыцыйнага мастацтва.
А ў рамках дня адчыненых дзвярэй спецыялісты Слонімскага аддзела рамёстваў правялі прафарыентацыйнае мерапрыемства “Рамёствы Слонімшчыны” — пазнаёмілі вучняў 11-х класаў СШ №5 з экспазіцыямі выставачнай залы “Ад мінулага да сучаснага”, прадэманстравалі майстар-класы: па выцінанцы, дэкаратыўнаму роспісу, ткацтве габелена, аплікацыі саломкай.
Малады спецыяліст Марыя Зелянко, выпускніца Гродзенскага дзяржаўнага каледжа мастацтваў, расказала пра спецыяльнасць “Аб‘ёмны дызайн” і перспектывы працы ў гэтым прафесійным накірунку.
Наведванне Слонімскага аддзела рамёстваў і ўдзел у майстар-класах дазвола вучням зразумець спецыфіку працы майстроў народнай творчасці і адчуць значнасць творчай прафесіі.
Выставачную залу “Ад мінулага да сучаснага” таксама наведалі гімназісты. Спецыялісты аддзела раместваў і традыцыйнай культуры расказалі дзецям пра прадметы быта нашых продкаў, прадэманстравалі працэс размінання льнянога палатна поцягам, паказалі, як вясковыя майстрыхі ткалі на старажытных кроснах.
Падчас інтэрактыўнай праграммы маленькія наведвальнікі выставачнай залы пазналі шмат новага і цікавага, а свае веды замацавалі ў пазнавальных гульнях.
